cap.ru сӑнӳкерчӗкӗ

Чӑваш Енре паянтан пуҫласа авӑн уйӑхӗн 24-мӗшӗччен «Лайӑх тракторист» рейд иртӗ. Профилактика рейдне Чӑваш Енӗн Гостехнадзор ӗҫченӗсемпе Патшалӑхӑн ҫул-йӗр хӑрушсӑрлӑхӗн инспекцийӗнче тӑрӑшакансем йӗркелӗҫ.

Рейд вӑхӑтӗнче вӗсем тракторсен, комбайнсен, прицепсен техника тӑрӑмне, вӗсен патшалӑх регистрацийӗ пуррипе ҫуккине, техосмотр тухнине тӗрӗслӗҫ. Унсӑр пуҫне тракторист-машинист удостоверенийӗ пуррипе ҫуккине те пӑхӗҫ.

«Вырма вӑхӑтӗнче кун пек рейда ҫулсеренех ирттеретпӗр. Пӗлтӗр, сӑмахран, пирӗн инспекторсем 222 единица техника тӗрӗслесе 51 кӑлтӑк тупса палӑртрӗҫ», — каласа кӑтартнӑ Чӑваш Енри Гостехнадзор пуҫлӑхӗ Владимир Димитриев.

Йӗркене пӑхӑнакансене ятарлӑ наклейка парса хавхалантарӗҫ.

Ял хуҫалӑх министерствин сайтӗнчен илнӗ сӑнӳкерчӗк

Чӑваш Енри агропромышленность комплексӗнче савӑнмалли сӑлтав тупӑнсах тӑрать. Асӑннӑ отрасль темле фестиваль те шухӑшласа кӑларма ӑста. Сӑра фестивалӗ иртсе кайнӑччӗ ҫеҫ халӗ тата «Медовый путь Чувашии» (чӑв. Чӑваш Енӗн пыл ҫулӗ) агротуризм фестивальне (илемлӗ те илӗртӳллӗ янӑрать) чӗнеҫҫӗ.

Ку мероприяти Шупашкарти «Пехет» агромаркетра ҫурла уйӑхӗн 17-21-мӗшӗсенче пулса иртӗ. Унтан вӑл Канаш тӑрӑхне куҫӗ. Ҫурла уйӑхӗн 22-мӗшӗнче фестиваль асӑннӑ тӑрӑхри Ҫӗнӗ Шелттӗм ялӗнчи кооперативра пулӗ.

«Мелилотус» ял хуҫалӑх продукцине тирпейлекен кооператив патшалӑх пулӑшӑвӗпе: «Агротуризм» тата «Малашлӑх» грантсем пулӑшнипе — самай вӑйлӑ аталанать. Вӑл апат-ҫимӗҫе астивсе пӑхмалли зал, кафе тата магазин уҫнӑ.

cap.ru сайтри сӑн

Республикӑра ку эрнере аграрисем вырмана тухнӑ, кӗрхи культурӑсене пухса кӗртме тытӑннӑ.

Утӑ уйӑхӗн 20-мӗшӗнче чи малтан Ҫӗрпӳ, Вӑрмар тата Красноармейски округӗсенчи аграрисем вырмана пуҫӑннӑ. Халӗ Патӑрьел, Вӑрнар, Шупашкар, Шӑмӑршӑ, Елчӗк тата Тӑвай округӗсенче те комбайнсем хире тухнӑ. Республикӑра пӗтӗмпе 900 ытла комбайн ӗҫе тухмалла.

Паянхи куна 959 гектар кӗрхи тулла пухса кӗртнӗ. Пӗтӗмпе ӑна 72 пин ытла гектар ҫинче вырмалла.

Ҫавӑн пекех аграрисем пахча-ҫимӗҫ пухса кӗртеҫҫӗ, выльӑх апачӗ хатӗрлеҫҫӗ. Ҫав вӑхӑтрах кӗркунне акса хӑварма ҫӗрсем хатӗрлеҫҫӗ. Пӗтӗмпе 84,8 пин гектар ҫӗр сухаламалла.

cap.ru сайтри сӑн

Паян Ҫӗрпӳ округӗнче йӑлана кӗнӗ «Уй кунӗ – 2026» курав уҫӑлнӑ. Унта Раҫҫейри тӗрлӗ регионти агропромышленноҫ элчисем пухӑннӑ.

Пирӗн республикӑна 11 регионти 57 организаци, паллӑ селекционерсем, отрасльти экспертсем, аграри предприятийӗсен ертӳҫисем, аслӑ шкулсенчи вӗрентекенсем тата ҫамрӑк специалистсем килнӗ.

Курав программи пуян: ӑсталӑх класӗсем, семинарсем, ҫавра сӗтелсем иртеҫҫӗ, выльӑх апачӗ хатӗрлекен тата ытти техникӑна кӑтартаҫҫӗ. 32 ертсе пыракан компани ял хуҫалӑхӗнчи пурнӑҫа кӗртнӗ ҫӗнӗ шухӑшсемпе паллаштарнӑ.

Хальхи вӑхӑтра аграрисемшӗн топливо ыйтӑвӗ ҫивӗч. ЧР ял хуҫалӑх министрӗ Андрей Макушев пӗлтернӗ тӑрӑх, республикӑра аграрисем валли саппассем пур, ҫавна май ӗҫсене вӑхӑтрах вӗҫлемелле.

www.cap.ru сӑнӳкерчӗкӗ

Сӗнтӗрвӑрри районӗнчи Николай Архипов ҫырла туса илсе укҫа туса пурӑнать. Ҫак ӗҫе пуҫарма ӑна патшалӑх укҫи пулӑшнӑ. Тата, паллах, хӑй ӳркенменни, тавҫӑруллӑ пулни, ӗҫрен хӑраманни.

Ҫӗр ҫырли туса илессипе Николай Архипов юлашки пилӗк ҫул ҫине тӑрать. 2015 ҫулта вӑл пахча ҫимӗҫ туса илессипе аппаланма пуҫланӑ, ҫӗрулми лартса тунӑ. Каярахпа фермер ҫӗрулми вырӑнне ҫырла туса илес тенӗ. Ун валли вӑл «Перспектива» (чӑв. Малашлӑх) грант укҫи ҫӗнсе илнӗ. Ку вӑл 2021 ҫулта пулнӑ. Ун чухне арҫын хыснаран 4 миллион тенкӗ илнӗ те унпа 70 пине яхӑн калча туяннӑ. Унсӑр пуҫне шӑвармалли тытӑм вырнаҫтарнӑ.

Ҫырла лаптӑкне хастар арҫын 6 хут ытла ӳстернӗ. Унччен вӑл ӑна 1,5 гектар ҫинче туса илнӗ пулсан паян 10 гектара ҫитернӗ. Тухӑҫ гектар пуҫне 160 центнер тухнӑ пулсан халӗ ку кӑтарту 200 центнерпа танлашать.

cap.ru сайтри сӑн

Ҫырла фестивалӗнче «Пахчаҫӑ моди 2.0» конкурс иртет. Ял хуҫалӑх министерстви пурне те унта ҫемйипе хутшӑнма чӗнет.

Унта пахчаҫӑсен хӑйне евӗр тумсемпе килмелле, йӑрансен хушшинче те илемлӗ ҫӳреме май пуррине кӑтартмалла.

Конкурса пӗччен те, ҫемьепе те хушӑнма пулать. Пӗр сӑмахпа, хӑвӑрӑн кӑмӑлӑр. Тӗплӗнрех ҫак каҫӑпа кайсан пӗлме пулать: https://xn--80adcefsfumi1bmx0hya7a.xn--p1ai/tpost/o4anniicp1-moda-sadovoda-20.

Аса илтерер: ҫырла фестивалӗ ҫурла уйӑхӗн 1-2-мӗшӗсенче иртет. Ҫурла уйӑхӗн 1-мӗшӗнче Шупашкарти «Пехет» агромаркетра пулӗ. Тепӗр кунхине Шупашкар районӗнчи Хыркасси патӗнчи питомникре фестиваль хӑнисем пухӑнӗҫ.

Кирилл Степанов страницинчен илнӗ сӑнӳкерчӗк

Элӗк районӗнче пурӑнакан Кирилл Степанова халӑх тетелӗнче аван пӗлеҫҫӗ. Унта вӑл хӑйӗнпе ҫамрӑк фермер тесе паллаштарать, ял пурнӑҫӗпе ҫыхӑннӑ самантсене кӑтартса парать.

Каччӑна федераци каналӗсем те хӑйсен кӑларӑмӗсене йыхравлаҫҫӗ. Халӗ каччӑ хӑйӗн хӗрӗпе паллаштарнӑ. Даша Алтай тӑрӑхӗнчен иккен. Маларах каччӑ ун патне темиҫе хутчен те кайса килнӗ, халӗ хӗр чӑваш ялне куҫса килнӗ. Пике ялта хуҫалӑх тытса пыма вӗренет.

«Эпӗ йӑлтах пӑрахса куҫса килтӗм. Тӑван киле, ӗҫе, юлташсене, хам хӑнӑхнӑ тӗнчене. Пурнӑҫри ҫӗнӗ утӑма эпӗ ҫӗнӗ хутшӑнусемшӗн, ҫыншӑн, ҫӗнӗ пурнӑҫшӑн турӑм», – тет иккен Даша.

«Контактри» сӑн

Чӑваш Енре «Ҫуркунне – 2026» ял хуҫалӑх ярмӑрккисем иртнӗ. Пӗтӗмлетӳ акӑ мӗнле: унта хутшӑннӑ ял хуҫалӑх предприятийӗсем 240 тонна ытла продукци сутнӑ.

Ярмӑрккӑсене республикӑри 200-е яхӑн хуҫалӑх хутшӑннӑ: пысӑк агропредприятисенчен пуҫласа фермерсем тата харпӑр хушма хуҫалӑх тытакансем таран. Ҫынсем ытларах вӑрлӑх, хунавсем тата калчасем, ҫӗрулми, пахча ҫимӗҫ, ешӗл ҫимӗҫ, сӗт тата аш продукцине, пулӑ, пыл тата ҫӑкӑр туяннине палӑртнӑ.

Кунашкал ярмӑрккӑсем кӗркунне те иртӗҫ.

cap.ru сайтри сӑн

Елчӗк округӗнче аграрисем кӗрхи культурӑсене апатлантарма тухнӑ. Ку – ҫурхи ака-суха ӗҫӗсен пӗрремӗш тапхӑрӗ.

Чи малтан ку ӗҫсене «Прогресс» акционерсен обществи пурнӑҫлама тытӑннӑ. Хуҫалӑхӑн 900 гектар ҫинчи культурӑна апатлантармалла. Хальхи вӑхӑтра 150 гектар кӗрхи тулӑпа 50 гектар кӗрхи ыраша апатлантарнӑ. Ку ӗҫе вӗсем «Туман-2» агрегат пулӑшнипе пурнӑҫлаҫҫӗ. Ҫавӑн пекех хуҫалӑхри специалистсем тӑрӑшса ӗҫлеҫҫӗ. Вӗсем ку ӗҫсене вӑхӑтра вӗҫлеме палӑртаҫҫӗ.

Красноармейски округӗнче ҫурхи уй-хир ӗҫӗсем пуҫланнӑ.Хире чи малтан «Таябинка» агрофирма тухнӑ. Ҫитес вӑхӑтра «Красное Сормово» тата «Караево» хуҫалӑхсем ӗҫе пуҫӑнмалла.

«Ҫыхӑнура» порталти сӑн

Чулхула облаҫӗнчи Пильна районӗнчи Калиновка ялӗнче те пастереллёз инфекцине тупнӑ. Ку ял Ҫӗмӗрлерен 22 ҫухрӑмра вырнаҫнӑ.

Документра палӑртнӑ тӑрӑх, ку инфекци харпӑр хушма хуҫалӑхри мӑйракаллӑ шултра выльӑха ернӗ. Халӗ унта чару мерисене йышӑннӑ: ку территорие ют ҫынсене кӗме, унта выльӑх илсе килме тата илсе тухма (инфекцие пула пусма янисӗр пуҫне) юрамасть.

Аса илтерер: нумаях пулмасть «Батыревский» хуҫалӑхра та пастереллёз инфекцине тупнӑ. Унти ӗнесене тӗп тӑвасине пӗлтернӗччӗ. Хальхи вӑхӑтра Патӑрьел округӗнче – карантин.